也談世界杯

波真係圓ga，正當我早上5:00好眼瞓等睇十二碼時，竟然在加時完場前1分鐘內，意大利連入2球，仲要入得好靚（在此得罪德國粉絲，因為意大利踢得好過德國，我仲以為90分鐘內意大利會搞掂tim！）。如果射12碼，應該德國會獲勝！

其實我都有唔開心ga，因為我鍾意的阿根廷及荷蘭竟然出局。阿根廷輸係因為教練，如果唔係應該會打低德國（到而家我都唔明點解出戴維斯，而唔出美斯，仲要好早就收晒d攻擊球員）！荷蘭我都有少少預左，因為整體合作並不理想。不過好彩法國打到d爭氣波，希望法國今晚再下一城啦，因為我真係麻麻地費高（始終都覺得施丹好過佢好多）。

鍾意阿根廷係因為佢地球員腳法好，合作性、小組都踢得好！
鍾意荷蘭係始於三劍俠，情意結！
鍾意法國則是近幾年，因為施丹和享利！


我唔鍾意的球隊是英格蘭，因為英格蘭次次都話好勁，但次次都無料到，兼且d波好悶，下下大棍上去，博個前鋒跑得快個對手d後衛，又或者靠碧咸七旋斬，戰術單調，所以我次次都唔捧佢（死啦，又得罪英格蘭粉絲）。不過有d個別球員都好有質素，我以前都好鍾意舒利亞。但朗尼d品真係唔得啦.......

希望決賽唔好係意大利對葡萄牙，咁樣冠軍賽會好悶！

鹽正之瓜與海

由於累積一些假期，要在八月中前放（離職前），所以星期一至三都攞假。

最開心是星期一與鼎鼎大名的鹽正之瓜把臂同遊海洋公園。熟悉我的人均知道海洋公園差不多是我每年必遊之地。因為內裡有好玩的機動遊戲和海洋生物。

今次我打算只去看所有的館，有些因為過往掛住去玩機動遊戲（我十分有研究，知道坐那個位置會最驚），所以錯失了不少好睇的節目。

原來雀鳥劇場好好睇，d雀仔真係識聽d指令，完場後訓練員讓我們與鸚鵡合照，真開心！
我們還看了海洋劇場，d海獅和海豚都好得意。完場後有隻海獅發脾氣，訓練員要佢返入後台，海獅竟然別轉面，然後沖了入水池，訓練員一臉無奈，好不容易才能請海獅回巢。

熊貓館也好好笑。因為安安不知為甚麼，十分活躍，並走近人群，謀殺了不少手機的space！

我又有玩旋轉木馬，摩天輪和越礦飛車。在此一讚鹽正之瓜，第一次玩已可把雙手舉起，厲害！

我覺得海洋公園是一個好好郊遊的地方，計計埋埋，我己同差不多10位弟兄姊妹到此一遊。

由於我十分喜歡海洋公園，所以我同阿強考慮會不會在9、10月買全年票！yeah

原本想把相片post出來，但因為手機的software同電腦撞，不能upload！

最後提醒姊妹們搽防曬要均勻，如果唔係就會好似我咁膊頭有tat紅左！

我最喜愛的土炮電視劇

近數年已沒有追土炮電視劇，但我必須承認，我是睇無線的電視劇長大的，想當年，風雨不改，甚至考試也不忘追睇，邊睇邊做功課。現在心血來潮，想數數自己最愛的無線電視劇集：

天師執位（翁美玲、苗僑偉）
神鵰俠侶（劉德華、陳玉蓮）
新紮師兄I及II（梁朝偉）
今生無悔（黎明、周海媚）
笑看風雲（鄭少秋、鄭伊健）
赤腳紳士（呂方、周海媚）
回到未嫁時（黎明、周海媚）
大香港（周潤發、關禮傑）
怒劍嘯狂沙（關禮傑、周海媚）
大時代（鄭少秋、劉青雲）

最鍾意係：我本善良（溫兆倫、邵美琪），每重播一次，我都追一次！

很可惜，現在的電視劇完全不好睇，每下愈況，再加上沒有時間，所以無追啦！

而麥強呢，由於他是少數的睇亞視大的人，所以就這個層面，我們沒有共同話題了！